Fortlumturia e Tij, Imzot Joani, kryeson shërbesat në nder të Grave Miroprurëse në Shën Vlash, Durrës

Kryepiskopi i Tiranës, Durrësit dhe Gjithë Shqipërisë, Fortlumturia e Tij, Imzot Joani, drejtoi shërbesat e shenjta në Skitin e Grave Miroprurëse, në kompleksin e manastirit të Shën Vlashit pranë qytetit të Durrësit, të dielën e tretë pas Pashkës, një ditë e veçantë kushtuar Grave Miroprurëse.
Në këtë kremtim të rëndësishëm, Kryepiskopi Joan bashkëmeshoi me Mitropolitin e Apollonisë dhe Fierit, Hirësinë e Tij Imzot Nikolla, si edhe me klerikë të tjerë të Kryepiskopatës së Hirshme. Atmosfera ishte e mbushur me devocion dhe pjesëmarrje të gjerë besimtarësh, të cilët kishin ardhur për të përjetuar këtë ditë të bekuar në ambientin e jashtëm të Skitit të Grave Miroprurëse.
Në fjalën e Tij, Kryepiskopi Joan u ndal gjerësisht te roli i Grave Miroprurëse në historinë e krishtërimit dhe të Kishës së shenjtë, duke theksuar guximin, përkushtimin dhe dashurinë e tyre të palëkundur ndaj Zotit Jisu Krisht. Ai nënvizoi se këto gra, pavarësisht frikës dhe rrethanave të vështira, ishin të parat që shkuan te varri i Krishtit, duke u bërë kështu dëshmitaret e para të Ngjalljes së Zotit tonë.
“Këto gra të bekuara,” u shpreh Kryepiskopi, “na mësojnë se dashuria e vërtetë nuk zmbrapset përballë rrezikut dhe se besimi i gjallë kërkon guxim. Ato nuk u ndalën nga errësira, as nga frika, as nga guri që u izolua varri, por ecën përpara me besim, duke na dhënë një shembull të përjetshëm për çdo të krishterë.”
Më tej, ai solli në vëmendje edhe figurat e Shën Josifit nga Arimathea dhe Shën Nikodhimit, vizitorit të natës, të cilët, ndonëse në kushte të vështira dhe me rrezik personal, treguan guxim dhe përkushtim duke u kujdesur për trupin e Krishtit. Kryepiskopi Joan theksoi se këta shembuj na ftojnë të gjithëve të dëshmojmë besimin tonë jo vetëm me fjalë, por edhe me vepra konkrete dashurie dhe sakrifice.
“Besimi,” vijoi ai, “nuk është vetëm një ndjenjë e brendshme, por një thirrje për veprim. Ashtu si Gratë Miroprurëse dhe dishepujt e fshehtë, edhe ne jemi të thirrur të jetojmë me guxim, duke mos pasur frikë të dëshmojmë të vërtetën dhe dashurinë e Krishtit në jetën tonë të përditshme.”
Pas përfundimit të shërbesave, Kryepiskopi Joan vizitoi edhe “Shtëpinë e Shpresës”, ku u prit me gëzim të madh nga stafi dhe fëmijët që strehohen në këtë qendër. Në një atmosferë të ngrohtë dhe familjare, ai ndau dhurata për fëmijët dhe shprehu mirënjohjen e Tij të thellë për përkushtimin e stafit në shërbim të më të vegjëlve.
Fëmijët, të mbushur me gëzim, interpretuan Himnin e Pashkës dhe këngë të krishtera, duke krijuar një moment prekës dhe të paharrueshëm, në shenjë dashurie dhe respekti për Kryebariun e Kishës.
Festa e sotme na rikujtoi rëndësinë e guximit, dashurisë dhe shërbimit ndaj njëri-tjetrit në jetën e çdo besimtari.

Radio Ngjallja