Leximet biblike

martë, 29 shtator 2020 – Leximet biblike
APOSTULLI – Efesianëve 2:19-3:7.
Prandaj nuk jeni më të huaj e të jashtëm, por bashkëqytetarë të shenjtëve dhe pjesëtarë të shtëpisë së Perëndisë; sepse u ndërtuat mbi themelin e apostujve e të profetëve, ku gur qosheje është vetë Jisu Krishti, në të cilin e gjithë ndërtesa e lidhur bashkë rritet në një tempull të shenjtë në Zotin, në të cilin edhe ju jeni ndërtuar së bashku për të qenë banesë e Perëndisë me anë të Frymës.
Prandaj unë, Pavli, i burgosuri i Krishtit Jisu për ju kombet edhe nëse dëgjuat ekonominë e hirit të Perëndisë që m’u dha për ju, se si me zbulesë ma bëri të njohur misterin, siç ju shkrova përpara me pak fjalë, prej të cilave duke i lexuar mund të kuptoni mëndjen time në misterin e Krishtit, mister i cili në brezat e tjerë nuk iu bë i njohur bijve të njerëzve, siç iu zbulua tani apostujve të tij të shenjtë dhe profetëve me anë të Frymës, që të jenë kombet bashkëtrashëgimtarë e një trup dhe bashkëpjesëtarë të premtimit të tij në Krishtin me anë të ungjillit, të cilit unë iu bëra shërbëtor sipas dhuratës së hirit të Perëndisë, që m’u dha sipas veprimit të fuqisë së tij.
* * * *
UNGJILLI – Llukai 5:12-16.
Edhe kur ai ishte në një nga qytetet, ja një njeri plot me lebër, i cili, kur pa Jisuin, ra përmbys, dhe iu lut, duke thënë: Zot, nëse do, mund të më pastrosh. Edhe ai ndeu dorën, dhe e preku e tha: Dua. Pastrohu.
Edhe menjëherë lebra iku prej atij. Edhe ai e porositi të mos i thotë asnjeriu; po shko, e rrëfe veten tënde tek prifti, edhe sill dhuratë për pastrimin tënd, siç ka urdhëruar Moisiu, për dëshmi për ata.
Po fjala për të përhapej më tepër. Edhe shumë turma mblidheshin për të dëgjuar e për t’u shëruar prej tij nga sëmundjet e tyre.
Po ai tërhiqej në vende të shkreta dhe lutej.

Kisha Orthodhokse Autoqefale e Shqipërisë